匯景燒味點心館 (已結業)

疫情期間有一段時間無黎藍田匯景商場探一位老前輩，今晚再去，老前輩話食開嗰間茶餐廳轉咗手，叫我一齊去試吓，佢話呢間茶餐廳勁就勁在有片皮鴨食，於是就一行四人去試吓。點了海南雞飯、片皮鴨兩食、花生炆雞腳同埋海蜇拼燻蹄。我覺得最有驚喜係個海南雞，肉質夠嫩滑，無諗過街坊茶餐廳有咁嘅水準。片皮鴨因為偏瘦，所以唔夠油香，不過如果你唔鍾意食咁肥嘅呢度就啱晒你。片皮鴨兩食個鴨殼用茄子炆，都幾好食。花生雞腳炆得夠淋又夠晒入味，性價比高，隨時好食過好多大酒樓嘅鮑汁雞腳。海蜇燻蹄就正常啦。整體食物質素高，價錢偏低，藍田居民有福了。