夢工房西日料理 (已結業)

食放題唔一定去旺角同尖沙咀嘅，原來葵芳都有一間，鄰近地鐵站附近的好爵中心商場，扶手梯上一層即刻揾到，價錢百幾元任食，平平地約埋朋友去試下。入去見到有火鍋配料區，食放題同時仲可以打邊爐，又真係幾特別喎。入座後每枱均有一棟食物點單紙，總數十三款，簡單清楚一目了然。刺身點咗三文魚 甜蝦 墨魚片 鮑魚片 玉子同埋松葉蟹棒，最愛三文魚，肉質肥美鮮甜，其餘整體質素尚算可以。壽司離不開三文魚北寄貝花之戀等大熱款式，樣樣細細件的的骰骰，咁樣反而仲好，食多幾件都唔怕會太飽。天婦羅同炸物做得幾好，最欣賞呢度的榴槤炸彈，每人每次限叫一粒，金黃色外皮香脆可口，外脆內軟好美味，一粒唔夠喉要點多一粒先滿足。仲有其他種類， 焗蠔 雞粥 燒羊架 串燒 拉麵 小食同沙律，食物款式應有盡有，呢度附近有唔少屋邨同屋苑，價錢大眾化相信會吸引好多街坊客棒場。雪糕選擇多多，最鍾意係Fruttatogelato波波球，一次過食齊幾隻味道正呀。