Egg O’Clock (已結業)

作為打工仔，返工最緊要就緊係放飯啦！ 食番餐好嘅晏晝，絕對係成日嘅能量來源！喺葵興嘅商廈KCC入面，聽講有間好高質嘅蛋包飯，究竟係真唔係？小編就專誠入去試試！KCC座落喺傳統工業區入面，雖然由葵興地鐵站有天橋接駁，但講真應該都係做附近打工仔生意多。喺商場嘅一樓就有幾間餐廳，今日嘅目標就係度啦！ 店名叫「EGG O’CLOCK」，食哂字咁一睇就知係賣蛋料理。成個menu都係見到蛋嘅元素，唔同配搭嘅蛋包飯、三文治、常餐都有！當中蛋包飯嘅配搭仲好L多，牛肉、魚柳、豬扒、漢堡，你諗到咩都幾乎有齊哂！原條鰻魚蛋包飯 套餐（$75)咁多選擇，唔想諗就揀個最貴嘅！平時去supermarket買條鰻魚都成50蚊啦，蛋包飯跟埋嘢飲都係75蚊，剩係個價都抵啦～ 雖然舖仔細細，但係門口都有堂食嘅檯可以坐低食。唔洗十分鐘，新鮮熱辣就整起，老闆仲好nice提醒食完要自己執返。嘩！雖然係用外賣盒裝，但擺盤真係一啲都唔馬虎－原條鰻魚真係成個盒打斜放先裝得哂，鰻魚煎得微焦，食落帶少少焦香，魚肉都好嫩滑！個蛋包飯真係落足牛乳去整，所以入口好嫩好滑，加埋海量嘅鰻魚汁，送飯真係唔怕唔夠汁！仲要有埋沙律菜，芝麻醬溝埋易入口。