亞蘇爾 (形點) (已結業)

元朗形點頗多食肆，這間門面頗為吸引，大玻璃柜陳設著即製葡撻，馬上入去試吓。侍應安排入座長卡位，夠晒舒適闊落。脆皮乳豬件配薯菜，外皮香脆，肉厚而多汁，十分可口，鹹度適中。砵酒燴牛尾非常腍滑，砵酒汁煮得好惹味，酸酸甜甜，水準甚高。葡國腸炒免治豬肉伴煎蛋配白飯甚有驚喜，葡國腸鹹香和免治豬肉十分相配，送飯最啱。甜品當然是我喜愛嘅葡撻，三款葡撻都試齊。焦糖葡撻最為美味，蛋厚皮脆，蛋滑酥皮焦香，好食而不覺油腻，冇得彈。咖啡葡撻亦有特色，咖啡味濃。芒果沙冰和荔枝沙冰均有果味，清新怡神。