💛脆皮芝士焗原隻新鮮龍蝦（$336/ 2隻）
賣相吸引，未食已睇得出面層香脆😋 龍蝦啖啖肉，芝士份量都真係幾多，但略嫌芝士太多覆蓋咗龍蝦味，稍為扣分😆
💛楚撚記原隻脆皮豬手（$135）
最抵讚係豬手已被起肉切件，真係方便我哋進食，啱晒我哋呢啲懶鬼😆但老實講，我真係覺得呢碟豬手麻麻......外皮係香脆，但口感又乾又硬，都幾嚡口，應該唔會再有下次🙈
💛香煎黑松露手打蓮藕墨魚餅（$95）
煎得幾香口，彈牙嘅墨魚餅混合爽口嘅蓮藕都幾有口感，而且仲食到淡淡嘅黑松露香味，係幾好食嘅😋
💛豉椒鵝腸（$92）
鵝腸份量都幾多，以豉椒炒的確惹味😋但感覺欠缺咗啲鑊氣，而且個汁稠咗啲，仲有進步空間嘅😆
💛楚撚記小炒王（$88）
每一間菜館都有自己特色嘅小炒王，楚撚記嘅小炒王有腰果、韭菜、蝦乾、菜甫及脆魚干等，夠晒鑊氣，真係香口又惹味😋推薦👍🏻
💛腰果炒肉丁（$73）
估唔到呢款菜式與小炒王好相似，只係將韭菜換成西芹，所以味道大致上差唔多😆一樣都係有鑊氣，都係炒得幾好食嘅👍🏻
💛蕃薯糖水/ 清補涼
飯後仲每位食客送糖水，有熱嘅蕃薯糖水或凍嘅清補涼可以揀😍蕃薯煲到好腍，有少少薑味，好足料👍🏻清補涼唔太甜，飲落清潤又解渴，唔錯😋
1
呢度菜式選擇都幾多，味道ok又抵食，可以有下次喎😋 另外一提，呢度如果唔預早book位，walk-in真係有排等㗎🙈
