皇茶冰室 (已結業)

網上有人話過希望女朋友有劉心悠嘅面孔、陳法拉嘅笑容、雷凱欣嘅身材、何家淑女嘅後台......而我家嘅A姐當然就有齊以上嘅所有嘢喇，雖然後台就無何家咁勁，但都叫做有我M佬幫佢撐腰架！而更好嘅係去邊食飯佢都無所謂，就算叫佢陪我食茶餐廳快餐店大排檔，佢食嘢個樣都好滿足架（當然我就知佢最鍾意日韓菜啦），而今日我哋就去咗荃灣食皇茶冰室，試吓久違嘅港式味道。鮮茄焗豬扒飯焗豬扒飯可以話係港式餐廳必有嘅名菜，即叫即焗，上枱熱辣辣，而份量一啲都唔少，豬扒夠腍又唔會焗到乾晒，而茄汁味夠開胃，唔錯！法蘭西多士除咗焗豬扒飯，西多士都可以話係港式餐廳嘅另一代表作，又係即叫即炸，食落好香口又唔會話油淋淋，正！椒鹽雞翼雞翼表面好脆口，椒鹽味夠晒，不過，肉質就相對較淡，可能要醃耐啲喇。龍鳳檸樂以前去冰室茶記都離不開奶茶、咖啡同鴛鴦，但近年就多咗好多花款，好似龍鳳檸樂，酸酸甜甜，係我的最愛。熱奶茶呀爸教落，冰室茶記留唔留得住客人，最重要就係杯奶茶，鍾意茶味夠濃嘅我，呢間絕對留得住我！