一本‧串里 (已結業)

之前去麻辣風雲食野果陣，見到佢地樓下開左呢間新嘅日本野，呢日經開果邊，決定同朋友仔試試先。餐廳入面有櫻花同埋鳥居，仲有好靚既燈籠，佈置得幾有feel，座位都寬敞，坐得幾舒服。❀時令生蠔❀生蠔大大隻，海水味淡，味道較均衡，冇乜腥味。❀珍寶赤蝦刺身❀蝦肉肥碩，口感充滿彈性，鮮甜爽口，想食多幾隻😆❀三文魚近腩❀脂肪含量高，口感肥嫩，好有魚油香味，必點。❀特長鰻魚壽司❀超級抵食，懷疑2舊用左成條鰻魚，鰻魚細嫩肉滑又肥美，配上甜甜地嘅蒲燒醬汁好惹味。❀木板海膽（原板）❀原板海膽先至$88，超抵，望落呈橙黃色，口感肥厚稠密，好似入口即溶咁，味道甘甜。❀吉列豬扒定食❀吉列豬扒外皮炸到金黃香脆，炸粉唔厚，食落唔會好油膩，豬扒肉嫰多汁，點少少醬汁食都夠，另外仲有薯仔沙律，酸酸甜甜好開胃。❀雜錦魚生丼❀有三文魚、吞拿魚、八爪魚、赤蝦、帶子及甜蛋等，仲加左蟹籽增添口感，用料豐富，魚生質素都唔錯，好大碗食到好飽。❀燒茄子❀見到有蒜蓉燒茄子就點左，蒜蓉味重，食落好香口。