小火焰韓式咖啡廳 (觀點中心) (已結業)

今日相約朋友一齊試下呢間韓式餐廳。餐廳裝修格局似cafe，但座位與座位之間距離不足，加上全場full house，未有cafe輕鬆嘅感覺，反而覺得擠擁壓迫。食物先係最重要。頭炮係呢個溶岩芝士牛肋包。一上枱就俾佢嘅份量嚇親。芝士一啲都冇吝嗇，多到係個包到流出來，難怪佢叫熔岩芝士。牛肋好稔好入味，加埋芝士一齊食，原來好match。麵包外層烤得好香脆，內層沾滿芝士同茄醬，咬落去外脆內軟，麵包香味，芝士同醬汁喺口內一併爆發，yummy。呢個柚子蜜糖雞翼炒年糕，雞翼食唔出柚子嘅味道，可能係俾炒年糕入面嘅辣醬掩蓋左。年糕太乾身，醬汁唔係太足夠。幾飽都好，食埋個甜品，咁樣先至叫叫做完滿。紫薯雪花冰賣相吸引，甜味適中，紫薯味濃。雪花冰質地柔軟，入口即溶。呢個甜品值得一試。