Whatever (已結業)

睇完餐牌，原來Whatever 係主打瑞士汁既雞翼/雞脾/豬頸肉，仲有各式各樣既三文治，全部即叫即做。店主主動介紹餐牌上無既食物，原來佢地menu 個個星期唔同，詳情可以睇佢地既facebook, Whatever 就係甘隨心隨意。

今期推介飲品係薏米水，我地order到最後一杯，買晒就無。店主另外推介就係洛神花茶同菊花茶。

2 瀏覽

薏米水

飲品大概5 分鐘就上枱。我地選擇加檸檬。薏米水落足薏米去煲，飲得出好杰身，加埋檸檬就更加refreshing! 薏米本身有好多好處，女士必定知道既美容去水腫，呢杯薏米水真係又消暑又健康！

1 瀏覽

雙檸水

雙檸就係黃檸檬加青檸。見到店主整呢杯野飲時係預先將檸檬楂汁，調教好味道先奉上，絕對唔係切幾片檸檬比你自己搞掂。其實甘做，多一重功夫之餘亦都好冒險，因為每個人接受酸味既程度不一，店主見到我飲一口之後，主動細心問我會唔會太酸。我立即回答唔會！好好飲呀！呢個酸味同甜度我覺得岩岩好！原來店主會主動問客人既意見，佢地發現男士接受酸味既程度會比女士低，而女士又唔中意飲甘甜既野。所以呢杯雙檸水佢幫我調教至較酸小甜，講真岩晒我口味！呢d 就係小店會做既野。試問你幫襯食連鎖店時，侍應會問你食物質素如何嗎？

9 瀏覽

因為食物係即叫即做，飲品黎左之後我地都得左一段時間。無無聊聊，就開始留意下個開放式廚房。見到有個籃比白布蓋住，仲有個風扇仔吹住，就問店主係乜東東。一打開，原來係一隻隻好靚既磨菇。佢地會每2日去有機農場買呢d 新鮮磨菇，吹住係因為天氣熱，甘樣就唔會甘易變質同保持新鮮。真係嘆為觀止，嘩，乜依家仲有食店會甘尊重食物架咩？

之後當店主處理我地d 沙律時，拎左一盤菜出黎，我忍唔住講左句"嘩甘靚既？！"原來呢d 就係我地之後碟主菜旁邊放既沙律菜。店主每日街市入貨，自來水洗過之後，再會用過濾水洗多次，之後就係甘排好係盤備用。其實伴碟菜成日比人遺棄，店主連處理伴碟菜都甘有心，真係不得不寫個服字。"甘我地自己都會食架嘛" 一句簡單回應，就知佢地真係用個心去做食物！
成日廚房井井有條，光猛又乾淨，真心想講我自己屋企個廚房都無甘乾淨。

首先上既係雞蛋芝士磨菇三文治

呢個三文治不在menu 内，係店主推介的。影相時已經聞到好香菇味。烘底三文治夾住剛才介紹既磨菇，切成片，雞蛋，火腿同芝士。菇味香濃我覺得除左係因為磨菇新鮮之外，份量亦都好足！由新鮮煎好既雞蛋包住，雞蛋煎得岩岩好，有少少蛋汁完全唔油。夾埋芝士同火腿，其實唔需要再加任何調味已經覺得好好食

另外我地分別叫左瑞士汁全翼配沙律同埋瑞士汁豬頸肉雞中翼配蛋沙律。其實瑞士汁雞翼大家可能都係屋企整過，我遇到既問題就係外面太咸，但入面唔入味。但呢度食到既唔會甘，瑞士汁唔係只停留係雞皮，仲入晒味，而且仲保持到肉質鮮嫰滑漏，原來佢地d 雞拎晒證書。豬頸肉無燒過就甘浸，爽口到你唔信，除左打邊爐，我未食話唔係燒熟既豬頸肉！店主話秘訣就係要有耐性，係要花時間去浸。相比起快餐文化，其他餐廳都浸定d 萬年雞翼等你黎買，即叫即上枱。其實已經係潛規則大家都知而且都接受左。你仲要玩即叫即做！Whatever, 有必要嗎？！
配埋既蛋沙律，有切粒雞蛋加埋其他雜果，加油蛋黃醬，將瑞士汁既咸味化解晒。而且沙律夠凍已經好加分！( 相信你同我都食過室溫沙律) 其實仲可以選擇配飯/面。但呢度既乾淨程度令我可以放心去食沙律！我下次再黎都會選擇食沙律！
再黎就係圖中果d 沙律菜。果d 經常被遺棄既沙律菜，好老實講平時果d 菜我唔會食因為我覺得一定洗唔乾淨。但知道左店主甘用心之後，我毫無猶疑地食晒！

當我地食得7788 時，驚喜來了。原來星期六日黎食野都會有野送。今日店主就準備左洋蔥餅送比客人。洋蔥無辣味，而且好甜，加左少少火腿，煎成洋蔥餅。碟上左邊有茄汁，右邊有淮鹽。點茄汁係保持食法一定好味，反而我同老公都中意淮鹽果邊，估唔到原來"甘都得！"味道好夾！

成間鋪得2張bar櫈，主要做外賣，我無諗過會係一間甘細既鋪頭度坐左差唔多2個鐘，亦都無諗過之後會打篇2000字既食評。係呢2個鐘入面，店主同我地既互動，連鎖餐廳絕對做唔到。小店就係有呢份人情味同想進步既心。就係呢2個鐘既互動，令我寫到我寫blog 以來第一篇2000 字食評。平時食完就走我真係好難寫到2000 字。我諗呢個亦都係openrice 想見到既野：食客同食肆既互動再由 blogger 分享出黎，而唔係交report 甘款。今餐真係獲益良多！