漁港艇仔粉 (鴨脷洲大街) (已搬遷) 新店位置

香港仔係香港傳統嘅魚產地🐟，有一樣名物叫艇仔粉，由船家喺船上面煮比客人食🛶。今次藉住食飯時間，專程走去試吓呢一個香港仔名物，不過今次我就唔係幫襯船上面嗰間，而係搭街渡過鴨脷洲試吓另一間出名食艇仔粉嘅小店。入到舖頭，大部份嘅客人都係叫呢一個最出名嘅香港仔名物：招牌艇仔粉。今次係我第一次食艇仔粉，原來艇仔粉嘅餸都幾豐富，有叉燒、燒鴨、魚蛋、炸魚片、紅腸、炸魚皮。首先要讚嘅係佢嘅炸魚皮，非常酥脆，又唔會碎濕濕，而且店舖都好慷慨，起碼都有四至五大片炸魚皮。其次要讚一讚個湯底，湯底係由大地魚熬制而成，湯底鮮味濃郁，我幾乎飲晒成碗。不過唔知係咪有落少少味精，飲完後都有少少口渴。河粉就用上幼河粉，非常滑口，而且份量都唔少。魚蛋只有一粒，係白魚蛋，不過唔係好彈牙。炸魚片方面，就略嫌炸皮有點硬。最後我再叫埋杯熱奶茶來作結，奶茶都算幾香滑，不錯。總括而言，雖然叉燒、燒鴨同紅腸等燒味唔係話出色過人，但以這個價錢可以食到六樣餸，仲加埋有魚湯飲，我覺得性價比都幾高。而且店舖嘅位置都幾方便，除咗由香港仔搭街渡過嚟之外，其實而家搭港鐵喺利東站A1一出就會見到，想懷緬香港舊日漁村情懷嘅朋友一定要來試試。