佢嘅門面超有特式,一睇就覺得返咗去老香港~
入到去嘅裝修都係好有心思,有懷舊嘅花牌,信箱,鐵閘~
如果早啲去無乜人的話,真係超適合影相打卡!
個人唔太愛咕嚕肉🍍,因為好地地一塊炸脆嘅肉點解又要用汁整冧佢呢?
但呢個鳳梨懷舊咕嚕肉包咗汁都仍然脆口,真係非常新鮮炸起!
而且伴碟嘅薯仔都有煎香🥔🥔
另外仲有士多啤梨腩排🍓
香甜嘅士多啤梨味,亦有加入片片果肉~
個人覺得咕嚕肉比較吸引一啲,二選一就可以揀咕嚕肉~
我完全係瘋狂飲佢個湯🙈🙈
通常點上湯浸時蔬嘅湯都係一般般,可能只係啲味精湯或者好少少俾啲高湯一類~
但呢個鮮魚湯杞子浸時蔬嘅湯真係好味,不過稍鹹~
邪惡max之心血管健康大挑戰~
又唔係成日食,好味最重要!
呢個餸絕對值得你挑戰一下心血管健康~
鹹蛋黃勁足料咁包滿每一片鮮魷,第一啖咬落去已經超驚艷!😋😋
難得敲碗成功,啲人肯陪我點風沙九肚魚😍
外層香脆,脆粉夠薄,入面熱辣辣又滑捋捋嘅魚肉,送啤酒一流!🍻
其實我好想叫臭豆腐㗎,但已經點咗呢個八味脆豆腐就算啦~
同風沙九肚魚類似,都係有脆脆薄薄嘅炸粉,豆腐幾滑~
因為唔食芥辣又唔食沙律醬,所無試到~
但朋友仔一致認為青芥好有誠意,真係堅辣堅攻鼻🚀👃
豬手又係我唔吃嘅菜式,但係佢哋話呢個係必點~
個皮好爽,完全無肥膩感。
粉麵飯類當中我最鍾意呢個蟹籽蛋白野菜脆米炒飯~
可能有人覺得有啲飯焦咁嘅嘢喺中間好怪,但我就喜歡佢食落有啲脆口~
而且炒得好有鑊氣,仲得一試!
其實我哋食咗好耐都唔覺得招牌炒米同頭油皇龍鬚炒麵有好大分別,雖然一個係麵一個係米粉🙈
兩個味道亦差不多,但都算乾身唔油腍腍~
個人覺得龍鬚嘅略勝一籌,因為魷魚鬚好味呢🦑
呢間真係好爆滿,我哋離開時,門口都仲有好多人等緊位~
想試嘅朋友,記得要訂位喔!
記得必試金沙脆鮮魷同埋鮮魚湯杞子浸時蔬啦~
1
1
1
1
