The BASE (已結業)

同事話收工不如一齊去食埋晚飯先走，我話既然你叫到，我就奉陪，不過如果唔好食我唔會俾錢架。前菜先食呢份芝士焗蕃茄大啡菇，芝士與蕃菇粒溶係大菇上面，賣相吸引，食落芝士夠香，蕃茄就鮮甜，而大菇就多汁，菇味仲好濃添，鍾意食菇既朋友應該點都唔會失望。意粉黎啦，係黑松露雞肉雜菌菠菜扁麵。雞肉大大舊夠彈牙，而且滲晒黑松露味入去，矜貴之外亦味道相夾，加上雜菌味道更令黑松露味更突出。至於菠菜都索晒黑松露與雜菌汁，令菠菜味道未至於單調，另外麵質夠爽，與菠菜口感形成對比，加上上面放有芝士塊，芝味更出。食西餐怎可能無肉呢？我地食呢份澳洲和牛西冷扒，未上碟已經見到賣相靚仔，牛肉切開後清楚看見泛紅，肉眼睇已經知道夠嫩。試入口就更清楚，牛肉上灑了黑椒粒，調味唔多，清楚能夠食出牛肉既鮮味，肉汁更甜，口感唔使講係嫩滑，點埋芥末醬，與牛肉味相襯，澳洲和牛的確名不虛傳，脂肪比例無咁高，食落都覺得較健康。