福岡漢堡扒 (厚福街) (已結業)

今日約咗由細玩到大嘅朋友去街，係去飲杯嘢之前食過晚餐先。揀咗呢間自製漢堡扒，好似幾得意咁，所以試吓。入到黎就比枱面呢啲鐵管所吸引，完全唔知咩嚟。睇餐牌發現原來呢一間係專食牛，但係最近戒緊牛嘅我，好彩佢仲有其他飯類。朋友佢就揀咗個細嘅芝士蛋蒜和牛漢堡餐，睇落好似好得意。因為要自己將啲牛肉擺去石板到燒，職員知我哋第一次食都好細心咁樣教我哋點樣整。而呢個時候枱上面嘅鐵管就大派用場，因為真係好有效率地吸走晒所有嘅煙，所以食完都唔會好大陣味。自己整嘅漢堡扒，想幾大啖就幾大啖。啲牛都幾Juicy，唔錯，而佢個調味啱啱好，唔會得個咸字，反而仲食到肉嘅甜味。而另外佢啲蛋都好好味，咁樣擺喺鐵板隔離都好滑。而我自己就叫咗個照燒雞飯，佢個飯都真係好大碗，一個人係食唔晒。而佢啲雞扒都算幾滑。兩個餐都會跟咗個麻醬椰菜沙律，當係開胃小食咁食。另外仲會有兜泡菜，同埋一碗麵豉湯，泡菜就幾好食，不過麵豉湯就太淡。另外我仲跟餐叫咗個原味炸雞做小食，佢個炸雞真係新鮮熱辣辣，都幾脆口。