大家樂 (金禧花園商場)

尋日猴子鋸咗個百幾蚊嘅西冷扒，今日早餐都盡量慳得一蚊得一蚊，所以幫襯平少少嘅大家樂。

呢間大家樂經常都擠滿客。

呢間喺金禧花園商場嘅大家樂早排重新裝修，家陣面積得返以前嘅一半，所以經常都擠滿客人，猴子唔想同人逼，所以平時好少幫襯。

大家樂自助點餐機。

猴子都係今日先發現，原來呢間大家樂引入咗自助點餐機，顧客可以用八達通、Alipay HK，或者WeChat Pay嚟畀錢。操作方法同麥記嘅點餐機差唔多，超級方便快捷。

用蛋黃汁撈麵一流！

$32

講返個餐，今日叫咗個紅燒牛腩粒煎蛋上海麵，因為呢兩日天氣好乾燥，唔想食多士麵包嗰啲「乾爭爭」嘅西式早餐。

啲麵腍咗少少。

$32

牛腩粒都幾夠味，食落口都幾煙韌，蛋黃汁撈埋落啲麵度就更加滋味，不過略嫌啲麵煮得腍咗啲，搞到冇乜口感。