裕記大飯店

營業中

休息中

今晚一家人到深井裕記食晚飯，閒日去食嘅最大優勢就係唔洗等位，車位亦都唔需要煩惱，揸車去真係好方便，如果係搭巴士小巴就要兜好耐。6個人叫咗一隻燒鵝，燒鵝皮脆肉嫩，最鍾意係啲皮一咬落去，鵝油就慢慢滲透出嚟，嗰種香味真係令人垂涎三尺！鵝髀位置就啖啖肉而且肉質嫩滑，淨係食隻鵝已經回晒本。小菜方面，嗌咗芒果牛柳粒，芒果唔會好甜，牛柳粒肉質咬口適中，一啲都唔韌，係略嫌芒果味唔夠出。咕嚕肉，賣相其實都幾差，不過食落又幾正！夠脆夠多肉已經贏晒，如果可以再多少少汁會更好。豉汁帶子蒸豆腐就比較差，因為豆豉唔靚，而且豆腐唔滑，如果用百福豆腐會好食好多。上湯津菜，個湯有少少鹹，食到底啲菜就比較鹹。