今次同朋友一齊點選咗厚切牛舌拼牛五花定食 $98 同埋鹽燒牛肋骨肉拼豬肋條定食 $98。定食都包咗前菜、白飯同味噌湯，今餐加配咗小食日式餃子 $15 同埋兩杯特飲熱柚子蜜 (+$8) 以及桂花果釀四季春(+$10)。
用手機落好單後，店員好貼心咁提供一次性圍裙比客人用，上菜都上得好快。
先嚟嘅係厚切牛舌拼牛五花定食。定食賣相一流，前菜漬物幾開胃，石燒方面有四片牛五花同四條厚身牛舌條。店方提供咗幾舊牛脂去塗抹石面、兩款燒肉汁，驟眼睇都好令人期待。
但到另一個定食上菜時，二人檯嘅位置已經唔多夠。鹽燒牛肋骨肉拼豬肋條定食同樣，牛肋骨同豬肋條各有四件，單睇肉塊嘅油脂分佈同紋理都知食材非常好。
燒嘅過程非常順暢，因為肉質好，牛肉輕輕燒一燒就已經好快熟，唔需要刻意留意火喉，一轉色就食得。
牛舌條放上石面時顯得有啲細份，燒時要注意各側轉色後仍要燒多一陣；而豬肋條比想像中無咁多油，補上牛脂塗抹一下，燒起上嚟都非常易掌控火喉。
到起筷時問題就嚟喇......未燒時睇落都夠多肉，但其實餸飯嚟講其實肉塊真係唔多夠😅。大概食完啲肉後，其實仲有小半碗飯未食完，味道上兩個套餐啲肉類都係有水準嘅，但份量上可能要再研究點加多啲配料，咁食起嚟會更盡興。
配料仲有半件冬菇，單以套餐而言真係唔多夠餸。
加配嘅餃子剛好配埋剩低嘅小半碗白飯，都叫仲夠餸飯，味道就不過不失。
比較有驚喜嘅係跟餐嘅味噌湯👍🏻。湯內嘅豆腐店方整成豆花，賣相固然加分，味道上亦都更加細滑，本身豆味都好夠，口感既有層次感亦都好順口。
飲品似乎唔係牛匠石燒嘅強項，口味普通偏甜，相比街邊手搖飲品略顯失色，整體中規中矩。
假日午市時段嘅牛匠石燒好旺場，就算訂咗座都要等一等。訂座大概等5-10分鐘就入到；如果walk-in可能要再等多10分鐘，時間都叫合理。食物質素方面燒肉類都喺水準之上，而其他小食、飲品都同普遍同類餐廳相近。整體而言非常值得一試，但點餐時可以叫多啲肉嚟燒，咁會更加滿足！
