僕之拉麵 (已結業)

今日下午要到全港最旺角落做嘢，做完又係時候搵食，見到戲院隔離呢間拉麵仍未試過，門口電視又播住：就算叉燒都會揀最靚嘅西班牙豬嚟整，即管試試佢。甫進店內，就被店裏裝飾吸引住。播着的是日本動漫兒歌，一面牆放着一堆玩具Figure與だるま公仔，天花掛着的是各地的通行手形木牌，對於仲被禁足香港嘅你同我，呢種情懷同氣氛已經係一種安慰。點咗個肉愛食者拉麵，貪佢夠多叉燒，仲有埋角切叉燒、蔥、筍同味玉。我另外再加左4片紫菜，個人十分喜歡用嚟沾湯。先講個湯底，揀左豬骨濃湯，濃度唔錯，飲落舒服，似係足料落去煲。麵質粗幼中挺，亦配合返湯底濃稠，至於半熟蛋就係亮點之一，味道、熟度、蛋香都做得啱啱好。雖然今日限定嘅蝦湯麵售罄，期待下次嚟希望有幸可以試下。