LM Cafe (已結業)

觀塘不嬲都係美食天堂，今日就同女朋友去到位於駿業街嘅LM Cafe。A2出口出商場轉入巷仔真行出大街就搵到，都幾就腳。餐廳裝修以白色為主，配上一啲掛牆裝飾，另有一番風味。夜晚八點左右到達，預先有bk位嘅關係好快就可以入座，仲係卡位黎架！見餐廳都幾多人幫襯，就連外國人都有。餐湯係羅宋湯，啲湯好足料。除左平時常見嘅蘿蔔、椰菜、蕃茄同薯仔之外，仲有辣辣。飲落酸中帶微辣，好開胃。香蒜牛油帶子意粉有好多嘅牛油同蒜香味，見都有5 6 粒帶子同幾種菌類。意粉煮得偏軟身，但有小小乾。帶子幾大粒，食落係爽口嘅。意粉同帶子都有陣陣蒜香味，好好食。黑椒香蒜牛扒拼炸蝦配龍蝦汁，原本係鐵板餐但女朋友怕啲聲所以轉碟上，但個人認位鐵板上先係原汁原味！牛扒雖然簿身，但仲長過支叉，表面燒到燶燶地，入面嘅牛仲有小小紅，入口即融。炸蝦有四隻，炸到好香口，啲蝦肉都仲粉紅色。個汁我叫左龍蝦汁，但食落似黑椒汁，有啲失望。蜜糖雞翼有6隻咁多，蜜糖淋左係雞翼上面，㓤起時仲有絲絲蜜糖連住。雞翼肉質算嫩，但雞翼醃得唔夠入味，蜜糖只留於表層，雞肉無咩味，有啲可惜。