翰騰閣 (已結業)

相識四十多年的小學同學，相約於翰騰閣聚餐，細個一同上學，一同比老師打手板的老友，一同打豆槍野戰。轉眼又四十多年，以前也有間中聚餐，今年因有同學由美國回來探親，所以又相約見面。今次有成十五六人之多，攪手話翰騰閣d枱夠大，一于聚一聚啦。太多年冇見個個雞啄唔斷，都成十五人枱面d花生同合桃都系得兩小碟，不過同學好布心從美國帶左d呤呤杏仁及72%黑朱古力供各人分享，要了個十二人餐，話有鮑魚及大青班，一上枱個拼盤就比較細個啦，個蟹黃翅都ok啦，不過鮑魚炆鵝掌好似咸左d。條大青班可能厚身，所以就過左火唔夠滑，另外加左隻燒米鴨(北京填鴨)，個部長d刀工唔錯，片皮不帶肉，我地加多六十蚊要了個鴨鬆生菜包(very ok)，d肉一d都唔干好食。甜品比較普通不值一提。可能系星期三唔多客，得幾個部長同侍應，雖然人手少個個d服務態度都唔錯，地方夠光大枱之間又有全身玻璃間開，嘈唔到格離張枱，整體來講不失為一個聚會好地方。可能過多幾個月又去過啦。