鴨仔冰室 (已結業)

其實經常黎愛琴坊呢度食野，貪佢選擇多，價錢貼地，是日黎左鴨仔冰室食午餐。同事未到，先看看餐牌，價錢又五十幾蚊起，已經包餐飲，而且呢間餐廳唔使自己搬有送餐服務，但都唔使加一。點了一人一份午餐，餐飲要了熱奶茶同凍檸茶，奶茶較淡較像英式口味，個人覺得不錯。同事話佢杯檸茶正常味，檸檬有四片之多，夠酸又甜好正喎。午餐仲送餐湯或沙律，有誠意喎。是日餐湯係羅宋湯，酸酸甜甜好濃蔬菜味，好飲。沙律菜新鮮爽口，用上黑醋汁夠開胃。自己揀左香煎龍脷柳刁草忌廉汁配飯，賣相不錯啊。龍脷柳有兩塊，煎得香脆，魚肉嫩滑好味。個汁勁正，食到好濃郁嘅忌廉，刁草香味十足，比一般茶仔嘅白汁就level好多，忍唔住用晒啲汁撈飯。同事份香煎雞扒及厚午餐肉配薯條蘑菇汁超大份，塊雞扒好厚呀！雞扒厚得黎仲好有肉汁，雞皮煎得脆口好正，咁大塊扒仲要加塊午餐肉，食肉獸表示滿足。薯條香口新炸起，熱辣辣的，仲有個蘑菇汁又係勁正，濃濃的菌味同好多菇菇，好有水準，直頭用薯條吸晒啲汁黎食呀～正正飯市十分多人，所以同同事都揀食晏一更，兩點左右黎就唔使等位了，呵呵呵。