Story Steak & Pasta (已結業)

一年後，我同女朋友再去闖蕩元朗，行到咁上下肚仔餓要食午餐，但型點商場食物價錢偏貴，係機緣巧合之下行咗去鳳群街，嗰度好多野食。我地見一間叫story steak & pasta既餐廳，見幾多人光顧，就入左去。餐廳環境充滿童趣，同場既顧客多是小孩同父母。餐廳嘅午餐選擇可謂非常多，種類以西餐為主。我叫咗香蒜辣椒蜆肉煙肉意粉。意粉硬度適中，亦充分吸收蜆嘅精華，加上適當蒜味同辣味，令意粉更上一層樓。配料包括蜆肉頭煙肉份量也好多，蜆肉既鹹香恰到好處。飲品方面叫咗熱朱古力，甜味適中。女朋友叫左招牌安格斯牛肉漢堡配薯條。牛肉同包皮既比例係1:1，整體味道較輕盈，不會太過膩滯，安格斯牛肉肉味重，薯條非常香脆。飲品方面女朋友叫左青蘋果氣泡茶，漢堡配搭梳打茶一流！另外我哋仲叫咗一碗南瓜湯，唔會太稠或者太稀，飲得出係南瓜糊，真材實料！最難得嘅係一份午餐包括熱飲只係＄47。呢嗰質素既午餐真係超值。值得一提嘅係鳳群街嚟元朗站並不遠，經型點商場大約走10分鐘便能到達。