Oyster Princess (已結業)

今晚又黎杏花村探朋友，路經此店就不自覺被Oyster呢個名鎖住，心引即起要入去望下Ｄ生蠔…店舖地方雖然唔大，但店內供應既生蠔種類都有幾多選擇；見到都幾新鮮，最後穩陣Ｄ揀左我至愛愛爾蘭生蠔！愛爾蘭生蠔肉質薄身爽脆，味道清新，海水味淡入口甜美，最啱我口味，而且價錢都算大眾化過下口癮都唔錯～除了主打生蠔外，店內有日式料理供應，食完冷盤食返Ｄ熱野係最好，跟手點左燒油甘魚鮫同燒牛小排烏冬鍋。燒油甘魚鮫魚皮香脆十分惹味，魚油甘香魚肉嫩滑，燒黎食係最好味，係店內必點！而小牛排烏冬鍋份量都幾多，好多蔬菜配料而且湯汁都幾濃，扁身稻庭烏冬軟滑彈口，好好味呀～食完凍野再食個鍋真係好滿足！