日常素食 (已結業)

天赦日，食素，放生！中午去咗五季禪食，下午嚟哩間日常素食幫襯.去到先知原來素食 buffet.上次食素食 buffet 係北角素食分子，大家都係素食 buffet ，好正常會比較一下.首講價錢，兩間收費都係一佰一十幾，不相伯仲.論環境，日常素食更闊落，攞野食唔怕撞到人，完勝！論飲品，日常素食選擇較多，北角素食分子飲杯甜飲都係得果個淡淡又唔凍嘅豆漿，日常素食有又濃又甜又凍嘅橙汁，飲品選擇亦比較多，完勝x2！論食品，先唔講味道如何，起碼選擇絕對比較豐富，攞完一轉，都重有慾望攞第二轉！北角素食分子，攞咗一轉已經無意慾攞第二轉，不單只選擇少，連盤入面嘅素菜份量都少，好似食廚餘.我又唔係好晚入場，北角入場晚上8點，黃大仙七點半入場，相差只半個鐘，卻相差極大，勝！論味道，日常素食雖未至於超級正，但味道唔會話太淡，咖哩薯仔辣得嚟惹味，勝！朋友住港島，話想去返港島食素，我話打死都唔去素食分子，好彩日常素食唔差，同朋友有交代！