文華咖啡冰廳 (已結業)

大檸樂，宿醉未醒，暈到午飯，黎杯可樂解解酒先 ﹗紅腸豉油雞髀飯，快餐黎加喎，等成十分鐘先有得食。第一次幫襯午市，真係估您唔到，超級勁難食囉 ﹗白飯濕爛，黏住我的櫻桃小嘴，您估軟飯易消化咩。紅腸炸到過晒火，乾爭爭，燶到變啡色，硬掘掘到刮口架 ﹗豉油雞髀皮又咸又濁，雞髀肉跟紅腸一樣乾爭爭硬掘掘，要肉緊地咬，要大力地趙，少點牙力都唔掂。鮮牛豬膶豆卜湯飯，我個飯實在太難食，唯有偷食同事碗湯飯啦。勁多飯喎，而且非常大碗，就算係我都覺得有點壓力。湯底散發出強勁青蔥草腥味，太利害，頂唔緊啊 ﹗湯汁淡某某，淨係得蔥味及超微弱清雞湯味道。勁鬆鮮牛腍劈劈又滑潺潺，無牙都食到。豬膶乾硬鞋，最好食係豆卜喇。試一次便夠，不過文華都將近榮休結業喇，都未必再有下次。