松山素食 (已結業)

天時暑熱，想食得清淡一點，素食當然是個不錯的選擇。中環蘇杭街有間松山素食，想幫襯好耐，但係次次中午食晏時間行過，排隊外賣都人山人海。因為怕排隊，始終未曾相識松山素食。今天剛巧星期六，人不多，就嚟個外賣素食。松山素食每天有多個素菜選擇，分為兩餸或三餸飯，包例湯，可外賣自取，亦可堂食，客人可自選素菜配搭。外賣兩餸飯都係30蚊，三餸飯都係33蚊，以今時今日既物價，加埋喺商業中心既中環，呢個飯盒價錢認真超值。但堂食價錢就比外賣貴一截，經濟的我，當然選擇超值的外賣。這個素食飯盒配搭很豐富，有咕嚕麵筋、雜豆腸仔炒蛋、粉絲節瓜，還搭兩條青菜。咕嚕麵筋炆得煙煙韌韌，口感不錯。雜豆腸仔炒蛋，素腸仔味道像真度高，雞蛋炒得夠香滑。節瓜粉絲煮得夠住家風味，節瓜爽口，粉絲冧甜。今日奉送鮮蓮葉冬瓜薏米湯，湯底十分清甜，有陣陣蓮葉香味，冬瓜薏米消暑。另外再加8蚊來個南瓜粟米小米粥，南瓜成粒狀，份量十足，加埋粟米小米粥底，清腸胃一流呢。