Nardo's Cafe (已結業)

老婆係吃貨，所以我地都成日周去食嘢，被佢傳染咗，搞到我都相機食先埋🙈。影埋影埋，有時都其實會想發表一下食後感，就由呢篇開始啦。呢間Nardo’s Cafe 响旺角，都ok 方便，一出𨋢就見到一堆胡桃夾子迎接我地。除咗胡桃夾子，入面都有唔少玩具放咗出嚟。仲有啲模型呀咁。咁樓上Cafe 當然有益智遊戲咁啦。忌廉蘑菇湯幾杰身但唔係粉感，好香蘑菇味，飲落去仲有唔少菇。呢個卡邦尼意粉望落同平時有啲唔同，個汁稀啲，但個味都唔錯，而且勁多配料，好多菇、火腿，仲有唔少三色椒同洋蔥，所以口感好豐富，感覺亦無咁漏。呢碟肉醬意粉上枱已經好香，都幾大碟。一叉起啲芝士拉哂絲咁，入口芝士味十足，肉醬甜甜地帶少少酸，好開胃。意粉唔會太軟身或太硬，條條都好夠味。我最怕cafe 啲飲品太甜，呢杯薄荷朱古力都夠朱古力，入口有薄荷嗰種涼快感，而且唔會太甜。其實已經唔係第一次上去，老婆鍾意食佢個肉醬意粉，我自己都覺得間嘢幾好，嘢食算好食，又無限時可以輕鬆自在咁嘆。