匯景燒味點心館 (已結業)

藍田匯景商場入面開咗間專食點心及明爐燒味嘅餐廳，估唔到入面嘅出品可以咁高質。今次點咗黑松露蝦餃、鮮蝦腐皮卷、鹹水角、鳳爪、馬拉糕、化皮乳豬飯、燒鵝髀瀨粉同埋蠔油油菜。 黑松露蝦餃入面嘅蝦超大粒，出面嘅皮就薄再加上黑松露碎，分外鮮味。鳳爪嘅醬汁就一流，好有傳統嘅味道而且鳳爪都好大隻。鮮蝦腐皮卷絕對係外脆內軟，點埋喼汁食既有海鮮味又有甜酸味好開胃。鹹水角炸得金黃色，表面包住入面嘅肉碎餡料，鍾意食香口嘢嘅朋友一定會鍾意。 馬拉糕係原個馬拉糕上，好鬆軟，熱食一流。重點推介一定係燒鵝髀瀨粉同埋化皮乳豬飯。燒鵝瀨粉原隻燒鵝髀上，點埋梅子醬食諗起都回味， 瀨粉就好滑嫩。化皮乳豬皮超級香脆，最緊要加埋乳豬醬食，口感更上一層樓。