禾庭手工火鍋 (已結業)

打邊爐嘅食材同湯底同樣重要，我哋就特別鍾意用老火湯嘅湯底，喺打邊爐前飲啖靚湯，再用細膩嘅湯底配上精緻嘅食材，咁至夠滿足！今日嚟到銅鑼灣港鐵站C出口正對面，新開嘅禾庭手工火鍋，地理位置夠晒方便，最重要係價錢一啲都唔貴，就可以嘆個高質火鍋。霸王藏嬌鍋霸王藏嬌鍋入面有黃油雞、南瓜、竹笙、桃膠同花膠，湯底充滿香濃嘅雞湯味，味道清香唔會過鹹，感覺無落味精。至於黃油雞有半隻，待湯底滾起就食得，雞肉嫩滑，就連雞胸肉都唔會嚡口；南瓜鮮甜；竹笙索湯惹味；桃膠份量超多；但就略嫌花膠份量較少。宮庭格格肉格格肉其實即係切粒豬頸肉，格格肉嘅肉質爽口，好有口感，豬肉味濃郁。手作芫荽皮蛋豚肉餃呢個手作芫荽皮蛋豚肉餃絕對係必點項目！呢個水餃嘅味道好似飲緊芫荽皮蛋湯，芫荽味道香濃，裏面仲有皮蛋粒粒，加上適當嘅豚肉份量，令一啖咬落去嘅時候完全爆汁，直頭係飲緊芫荽皮蛋湯一樣！黑松露墨魚滑黑松露嘅味道好出，墨魚爽口彈牙，啖啖墨魚滑都充滿黑松露同墨魚嘅香味，喺口入邊迴腸盪氣。水魷魚呢度嘅水魷魚份量好多，但我哋更想知道佢嘅入貨來源，哈哈！因為同出邊淡而無味嘅水魷魚大不同，呢度嘅魷魚真係有魷魚味㗎！