繼 (已搬遷) 新店位置

拜訪家姐有口福，多得姐夫常出差，家姐今晚帶我去食日本菜，佢鍾意去不遠的 D2 Place 因為有位泊車，去咗一間叫繼的日本餐廳，行都大門已經覺得佢好正宗，家姐問我想食日式料理或鐵板燒，一入門就先見到張鐵板燒枱，咁就食咗呢樣先啦！我哋兩個人叫咗個二人龍蝦鐵板餐，嘩！$2080，大家姐話呢度啲嘢新鮮物有所值！餐前小食是開胃酸甜的水雲及海葡萄沙律，本來下午茶完飽飽地，食完即刻胃口大開。我哋今晚就食呢一盤，嗰隻龍蝦真係活的，仲郁㗎！師傅手法純熟，好快就有得食，首先有日本響螺，好爽脆，超美味。今晚我最鍾意第一當然係龍蝦，因為超新鮮、超厚肉。但令我印象最深的，係魚鱗都可以食的白甘鯛，真係諗佢唔到，點樣做到魚鱗脆口但魚肉正常的呢？冇留意師傅點做。下次再嚟睇清楚。另外帶子做湯，用新鮮紫菜做，味道很好，面前爐煮更加增好感。輪到和牛，厚薄食法都好好，鐵板燒師傅煎到熟度啱啱好，超滿足。埋尾鯛魚湯、炒飯、炒菜配漬物及換了一杯紅茶，咁樣自己都已經係一個完美嘅餐。建議大家唔好揀雪糕為甜品，因為特色自家製紅豆燒餅非常好食，必要試。