合時小廚 (裝修中)

我完全冇諗過食小菜係要等四個幾月先有得食，當時我係乜都唔理訂咗先講，之後再搵人食。好彩我都搵到朋友一齊試，最緊要係食物質素都唔錯，無辜負到我碌到去西灣河！當晚基本上叫哂招牌菜，蝦多士足料之餘又炸到夠乾身，真係會令我有少少掛住😛煙燻雞同樣係高質菜式，煙燻味好足，豉油雞亦醃得夠入味。花雕蒸馬友又係出色之作，首先條魚一定要新鮮，蒸嘅時間要剛剛好，魚肉先可以夠鮮嫩。而花雕酒係令另成道菜式更昇華，花雕酒味真係勁香！小炒王都唔錯，勝在炒得夠乾身。薑蔥焗蟹煎腸粉就當晚最惹味嘅菜式，煎腸粉甚至係吸收晒炒蟹精華，不過相對地較油膩。焗豬扒飯反而係最令我哋跌眼鏡，味道絕對唔差，份量至少夠八個人食，但原諒我cheap啲講句大家樂嘅焗豬都差不多水準啫！