竹地小館 (已結業)

十二月份疫症還未肆虐之時，星期六晚要喺旺角搵地方食晚飯，絕非易事。嗰晚我做完嘢好肚餓，一路行一路行，結果要行到呢個偏僻嘅位置，先至搵到呢間即時有位唔使等。叫咗佢個招牌菜肉餃，三十五蚊有十隻，好抵食。呢度係開放式廚房，坐喺吧櫈上面，可以透過大玻璃窗觀望老闆製作食物嘅過程，倍感衛生又安心。食物上枱，餃子雖然未算好大粒好飽滿，但係賣相都唔錯。味道方面，菜同肉都調味得宜，較為特別嘅係入面嘅菜切得幾大粒，頗有咬口。至於個湯底就正正常常，簡簡單單，據老闆喺某篇報道入面講，由於舖頭太細，只能夠準備一鍋湯底，就係用豬骨，豬皮，黃豆，薑同剩餘蔬菜熬製嘅豬骨湯，雖然簡單，但心機十足。小店舊年七月尾開張，正值反修例運動如火如荼，嚴重影響生意，90 後老闆甚至諗過執笠，不過佢認為 “真正對我們造成損失是警察”，反而對示威者非常諒解，呢啲咁有良知嘅小店，一定要多多支持呀💪！