灣景廳

因為工作關係，所以要黎呢到食飯。餐廳座位都算幾舒適，環境又唔算太嘈，食物種類雖然唔係太多，但係以咁既價錢，自助午餐黎講200蚊有走都算係咁架啦。冷盤有沙律，雜菜，薯仔，水果，粟米，火腿同埋海鮮等等，沙律菜好新鮮，但係相比下海鮮就麻麻地啦。刺身壽司選擇不多，刺身只有三文魚及鯛魚兩種。三文魚相對比較新鮮，至於壽司賣相同味道都幾好。熱盤款式唔算太吸引，稍為比較特別既都係湯粉麵檔，可以隨便揀幾款食。較為驚喜既係有豬腳薑，呢款食物都幾受歡迎。甜品方面有各式各樣既蛋糕，泡芙，麵包布甸，雪糕，朱古力噴泉同埋自助pancake機等等，應有盡有，朱古力噴泉同自助pancake機仲特別吸引，可惜除左麵包布甸之外，其他甜品整體味道同酒店級數似乎仲差一大段矩離。餐飲方面亦都係自助，有各式各樣既果汁，咖啡或茶同埋熱朱古力供應，值得一讚既係杯 cappucino ，奶同咖啡既比例近乎完美。