品越越式料理 (士丹利街) (已結業)

不嬲午飯時間係中環搵位食飯都係一大挑戰。今次同行朋友想食越南嘢，於是就揀咗呢間品越啦。位置離地鐵站大概兩分鐘嘅路程，係樓上舖嚟嘅。見到有少少人龍，不過唔算好長，結果等咗大概三四分鐘就可以入座，尚算方便。中午人都幾多，要同人搭枱。望望個餐牌，唔係平時嗰個餐牌嚟嘅，而係一份只有13款午市套餐選擇嘅餐牌。我揀咗豬扒拼雞扒飯，貪佢兩款肉類都有抵食啲。有啲女士會選擇湯檬，都係唔錯嘅選擇。飯既分量可以接受，有啲香蔥喺上面令到啲飯香口啲。不過有樣唔好就係啲肉質比較硬同埋乾身。個人認為雞扒畀豬扒好食，不過其實味道都只係一般，比起同類嘅越南餐廳遜色，可能因為集團式經營所以較為行貨。另外加咗特飲，椰汁紅豆冰都幾好味嘅。紅豆尚算 香口，分量可以接受。呢啲午市套餐連埋特飲大概一百蚊一個人，價錢偏貴，不過呢間餐廳始終係等位快，適合附近嘅上班一族。