吉壽日本料理 (已結業)

吉壽聽人推介得多，今日第一次去試下佢，因為太多人侍應都好忙，出去行個圈睇下，發現超多飲品同小食，飲品種類極多，小食方面有小丸子、日本枝豆、芝士餅、甚至連葡撻都有，未入場已經覺得十分吸引。正場時間，朋友不斷落單叫食物，選了好多食物：刺身大大盤，鮮蝦鮮甜，三文魚亦切得非常厚身，帶子夠大粒新鮮，款式應有盡有，選料又夠新鮮肥美！最令人驚喜既係呢度既蟹粥，蟹蓋膏唔少，粥煲到好綿，我呢個愛粥之人食到停不了口！一口燒牛肉燒得夠冧，海膽手卷既海膽份量多而又新鮮，簡直係必叫之選，呢度食物既size都唔會好大，變相食多幾舊都無咁快飽肚，啱晒我呢啲眼闊肚窄嘅人。炸物上碟熱辣辣，一口香芋波波特別好食，唔會過甜又有咬口，一口芝士外脆內軟，芝士味亦都夠突出。另外仲有唔少食物值得推薦：羊架，鰻魚，燒蠔，有水準之餘食得出係上等貨色。甜品種類夠晒齊全，有大腳八雪條，又有yogurt。總括來講，冇諗過呢度食物種類咁多，味道好好而價錢亦唔算貴，值回票價！