是夜同老公二人撐邊爐腳，但兩丁友打邊爐，最頭痛係叫唔到多款，任食火鍋食物質素大多一般般，再諗就晚餐變宵夜嘞～～～
就嚟咗巧得鍋，食過午餐都唔錯，就試下火鍋！發現有火鍋套餐！
套餐兩位起，唔計個鍋底同菜盤，有十三款食物
包甜品及飲品，可揀特飲唔洗加錢，而甜品係好神秘嘅
前菜：麻辣雲耳、涼拌蓮藕蓮藕清新爽口～雲耳爽辣，醒胃～正！
滋補花膠燉竹絲雞鍋真材實料，除咗花膠同烏雞，仲有其他藥材，越煲越濃味～
有兩大條花膠，中途有待應幫忙剪開。
牛肉併盤
有四個不同部位，金錢牛𦟌、牛脷、牛柳粒及牛頸脊，每個部位口感不同，但都係咁牛味濃郁又新鮮～
巧得蔬菜盤排名不分先後，有：冬瓜冬菇南瓜娃娃菜秀珍菇金菇白菜油蜜菜生菜，加多粒車厘茄。
新鮮～
巧得大拼盤拼盤有：大扇貝、鑽石蜆、日本廣島蠔、日本蟹柳、蜂巢豆腐、手打墨丸、韮菜安格斯牛肉餃，牛肝菌羊肉餃。
好豐富呀～如果兩個人散叫就好難試到咁多款式嘞
樣樣都新鮮好食～～鑽石蜆每人得一粒真係唔夠喉囉⋯⋯
仲有呢隻廣島蠔，肥到呢～煮完都仲咁大隻！
（前）檸檬青蘋果、（後）鮮果特飲兩杯都好飲，我鐘意檸檬青蘋果，酸酸地，fresh啲；鮮果特飲係奇異果味，溫柔啲。
紫心蕃薯丸問：我 答：侍應
點餐時。
問：餐甜品係咩？
答：一杯杯細細杯（指住遠處享用緊唔知係布甸定啫喱嘅客人），好似嗰啲咁。
叫起甜品，等左五分鐘，我以為漏咗，追問下，佢話整緊。
整緊？布甸啫喱而家整？咁神奇？跟著等咗十幾分鐘就嚟咗四粒金黃波波～
炸得好靚，筷子篤落去就feel到脆，忍唔住好想快啲試，但係超級熱！用筷子篤個窿拎返出嚟，有團煙走出嚟
所以我唯有打開佢攤攤先～
個皮不得了，外皮脆，内皮煙韌，一路𡁻有啲似煎堆嘅感覺，入面紫薯香，又唔會太甜，勁好食囉！
最後讚下個爐嘅設計，四邊即時抽風，唔會被蒸氣吹到眼鏡矇晒，食完之後個身都會有陣邊爐味，但無咁勁
呢個設計無得頂！
真係「巧」得嘅火鍋套餐解決我（對食物）花心嘅問題心機紫薯丸，超好食！驚喜！:)打邊爐最緊要係個爐。
