同人鍋 (已結業)

同屋企人食飯最緊要係可以舒舒服服咁慢慢食，慢慢嘆！行過尖沙咀山林道一帶，見到有無限時任食火鍋，餐廳門面又幾有特色，就呢間啦！先來雞煲，雞煲有辣有唔辣，近排已經食太多辣野，就揀個唔辣啦。未打開蓋已經聞到好香，雞肉嫩滑，而且好入味，大家都對呢個雞煲讚口不絕！再來美味ge火鍋餐。湯底有得揀花膠湯底或者原隻龍蝦湯底。花膠有豐富骨膠原，對皮膚同身體都好好，就建議揀花膠湯底。湯底好清甜，而且花膠都好足料，第一次用花膠湯底打邊爐，感覺好有營養好真材實料。隔離枱點左原隻龍蝦湯底，嘩！係一隻都幾大隻ge原隻龍蝦，好吸引！不過我地個花膠湯底咁鮮甜，都無後悔啦😁😁😁好味ge野梗係要食先，免得一陣間太飽食唔落就慘慘豬啦😂😂😂海鮮拼盤有鮑魚，蜆，蠔，蝦，蟶子，魷魚，鮮魚片，都算豐富啊！火鍋配料有好多選擇，而且都係任食。個人比較喜歡台灣腸，魚腐，響鈴同紫薯水晶包。大大個響鈴脆卜卜，涮一涮就食得，非常可口! 每一次都好享受都屋企人食好野ge時間，所以無限時任食真係唔錯ge選擇，唔使趕，鍾意食幾耐就幾耐😁