富久保手打烏冬 (已結業)

一直對炮台山上的手打烏冬小店,惦念非常.可惜地點唔多就腳,已經多年無光顧.日前放假要出老尖辦點事,醒起City super food court內有間開宗明義標榜手打烏冬"富久保".聽過朋友品題過有不俗評價.見廣場直行直入大把位.在Counter先落order,後比錢.正所謂天氣凍凍地最好食臘味,四月尾天氣悶熱,來一個冷食烏冬,實在深慶得人.手打烏冬外觀四四方方,無稻庭般幼細.比較粗身,口感煙韌彈牙,非常有水準.醬汁並沒有KC兄講得咁咸,香味就真係無乜.在呢個天氣,有一客這般醒胃的冷食烏冬.其他少少缺點,已經可以包容.附送的三粒墨魚丸,呢味基本上無論係街邊同日式超市food court,水準都係一樣接近麥記.一式一樣.求其三粒到肚就算.寫就寫唔出有甚麼特別.手打貨色,同普通現成貨色.兩者一比,高下立見.一食就食得出,孰優孰劣,由你決定.但當你吃過出自師傅,用力打真軍做出來的烏冬,咁你仲會唔會去吃一些軟淋淋,乏而無味的飛機貨?