The Captain's House (已結業)

我是第一次寫食評，因為真係非常差，所以一定要post出來，免得大家中伏。我哋book咗8:00-10:00pm時段，我哋點咗海鮮袋，非常唔新鮮，蝦肉極之梅爛，鮑魚唔淋，帶子唔新鮮，汁冇味。另外其他食物，我真係搵唔到一樣食物是可以讚，所有員工態度好差，剛入座時，我哋問第一個侍應拿水，佢完全冇理我走咗去，再問另一個，佢只拿一杯水，之後走咗去，但係佢哋不是忙緊，佢哋只是企在門口位置傾偈，因為這個時段，客人唔多，枱都唔full, 所有侍應都是黑起塊面，好似唔想招呼客人咁。因為我哋一向去食飯都會自帶酒，今次帶咗2支，我知道要收$150/支開酒費，但係完全沒有侍應幫我哋開酒及倒酒，全部都係我哋自己開，我哋食到9:20左右，打算開第二支，有個侍應見到，即刻行埋來話要收多$150，我哋話知道冇問題，佢竟然黑哂面同我哋講，我哋呢度10:00pm要收工喎，佢嘅意思好似叫我哋唔好再開酒，唔好再坐，之後佢仍然沒有幫我哋開酒。我從未食過一間食店係咁嘅招呼，佢哋好似個個都唔想做咁，9點幾已經想你埋單走，但係我哋仍未食完野，已經趕住收枱，真係好差！好差！好差！