共享私房菜 (已結業)

話說我通常會喺呢一間買外賣，一買都會係麻香手撕雞，今日我見到佢哋嘅餐牌有樣新野，叫做酸菜石斑片嘅，好耐冇食過呢個菜所以今日叫咗佢。用WhatsApp叫外賣非常方便。上去攞嘅時候發現今日好多人，除咗好多人買外賣之外，堂食都坐滿人咁濟，估唔到呢間野多咗咁多人幫襯。外賣不嬲都係一個飯盒，一碗湯同埋一杯熱飲。湯我叫咗五指毛桃燉鴨湯，非常清甜唔太多油，仲一定係冇味精，因為我飲完唔覺得口渴，秋天啱啱好。到個飯盒，酸菜石斑片飯，石班切成一片片，首先炸過，客人叫先至到落個酸菜湯度，咁樣石班片就可以保留着香脆嘅口感，又可以索晒啲湯汁。呢個餸除咗石斑片，酸菜湯先係靈魂，有少少麻辣，我見到有薑同埋有黑椒完粒係啲湯度，因為係少少麻辣所以可以接受，酸菜湯嘅酸唔太夠，因為我個人好鍾意食酸，所以我覺得呢個才可以再酸啲。都係果句：今時今日30幾蚊嘅外賣係非常難得，嘢食仲有返咁上下水準，非常支持。