老闆火鍋冰室

營業中

休息中

呢期天氣又開始轉涼，朋友又鐘意打邊爐，呢日我地就一齊去左元朗食飯試新野。呢到有小菜，又有打邊爐，兩種選擇都好吸引。最終我地都係揀翻打邊爐，湯底勁多唔同既選擇，而我對花雕醉雞都情有獨鐘，所以就揀左呢款湯底。藥膳花雕醉雞窩雞件浸住酒分開上枱，窩入面就放左唔少藥材，一上枱已經聞到好重既花雕味同藥材味。雞件肉質幾滑身，新鮮彈牙，湯底亦有濃濃既香味，唔會有好咸味精味道，感覺真材實料。安格斯牛頸脊超推薦！睇油花都知口感一定唔會差。比較薄身，落湯淥一淥好快食得。牛味香濃，肉質算比較嫩滑，白色位帶少少脆身，超正！花膠仔佢係比較薄同滑身既花膠，相對可以發到好大好肥厚既花膠黎講，雖然唔索湯，但口感比較彈牙有咬口。皇帝菜/萵荀菜類可以選擇一份或半份，都比較新鮮。打邊爐餐廳有得叫既話，呢兩樣菜都係我必點既菜類～老闆水果茶有小杯大杯之分，大杯足夠最少兩三個人飲，睇清楚先好叫～入面有新鮮水果同罐頭水果，茶味足夠，唔會過甜。但建議搞勻先飲，因為糖水會沉底～另外想提一提既係，餐廳既抽風系統做得唔錯，雖然無一個獨立既抽油煙機對住每張枱既爐位，但我地打完邊爐出翻黎個身都無乜油煙味，抵讚！