永年士多港式車仔麵 (加拿分道)

營業中

休息中

黃昏時候，又係肚仔餓既時候，唔想食到咁飽，係尖沙咀左行右行，永年士多車仔麵既招牌就出現係我地眼前，永年係元朗好出名，出身大西北既我梗係試過老店水準，男朋友聽到之後雙眼發光，即刻話要沖去排隊，鋪頭採用快餐店模式，排隊落單，再到櫃檯拎食物，想試多啲餸既我地，決定試試聚十寶於一碗既 — 十寶大碗麵。唔好睇個湯底好似好清，以為佢無料到唔夠味，食落濃味到嚇親你，湯底帶有滷水既甜味，唔會死咸，加上鋪頭特製既辣汁，微辣已經好有勁道，愈食愈過癮。最出色既餸莫過於豬大腸，小小一條豬腸蘊含著無窮美味，豬腸處理得好好，唔會有太多肥膏，滷到好稔，好夠味。另外蘿蔔都係世界級，蘿蔔吸收晒滷水汁既精華，咬落去爽甜唔會有渣，其他餸好似豬血、陳皮魚蛋、雞翼、魷魚等都滷得好好味，無伏位。唯一美中不足就係杯抹茶紅豆冰，賣相雖然幾靚，但紅豆煮得唔夠甜，冰又加得太多，搞到杯野太淡，可惜。