蘇媽.蘇媽馬來西亞茶餐室 (已結業)

蘇媽真係睇住佢一日好食過一日，第一次食蘇媽講緊佢仲係巷舖，個時已經比佢地嘅喇沙深深吸引住，湯頭好濃郁，蝦味好鮮，食過咁多喇沙得佢一間有眼前一亮估佢唔到嘅感覺。事隔一年左右蘇媽已經開新舖，覺得真心抵佢開到新舖因為佢有實力唔係靠gimmick。當日11點半左右去到已經有幾組人係度排隊，一開門坐低無耐就坐滿晒。新舖店面設計好有味道，係基隆街別樹一格好搶眼。本來想叫一碗喇沙同椰漿飯，但係肉骨茶喺舊舖食唔到所以放棄咗椰漿飯。喇沙一貫地好食，我以為我下定咗每次嚟都一定要叫喇沙嘅決心，但係肉骨茶完全令我改變呢個想法！我本身唔多鐘意食肉嘅人，一來覺得食完紅肉之後胃好唔舒服，特別係豬肉好多時都有陣臭騷味，但呢度嘅肉骨茶（一字骨）係可以以香甜嚟形容！食呢個肉骨茶好特別，侍應會先針一杯熱湯比你，湯頭藥材味好清幽，肉香同藥材味好平均，唔會搶去各自風頭。暖完身就會上肉骨茶，舊一字骨肥瘦分明，一層油脂一層瘦肉，瘦肉好腍無起筋，油脂入口即溶！溶起口有陣陣嘅油而不膩嘅香味，食完之後侍應又會針多杯熱湯比你作完美嘅ending。好食嘅馬拉嘢其實香港地好多，但想返轉頭再食嘅唔多，蘇媽係其中一間，特別係佢嘅肉骨茶真係好有心機