炭火地雞 (已搬遷) 新店位置

餐廳環境好寬敞，主打以本地新鮮嘉美雞為主，我地專登試左雞蠔肉、雞全翼、香脆雞皮配香蔥酸汁同免治雞肉棒，肉質富彈性，肥美又有雞香味，雞皮都炸到金黃香脆。煙燻雞火腿他他第一次生食雞火腿， 感覺有啲似食緊刺身一樣~撈埋生蛋、芽菜、 香蔥等，用紫菜包住食，覺得好豐富。雞肝醬多士香脆多士上塗滿咗濃濃的雞肝醬，不會比昂貴的鴨肝醬差，仲撒上花生粒，我自己好喜歡。除咗主打嘅雞類之外，仲叫咗A4和牛崩沙腩、豚五花腩鵪鶉蛋、大根、炭燒白鱔。全部都各有特色，但共同點係都好juicy，唔會又乾又燶，原來所有串燒都係用日本備長炭燒，更能鎖住肉汁，價錢貴點我都覺得值得。串燒會放上方碟，有各式各樣嘅調味:柚子胡椒、一味唐辛子粉、日本黃芥末、檸檬同青檸，大家可按喜好自己添加調味。最後甜品叫咗焦糖番薯配雪糕，金黃色嘅番薯表面有一層脆脆嘅焦糖，暖笠笠非常甜蜜滋味，加上凍冰冰嘅雪糕，一凍一熱，吃得過癮。