燒蝦哈 (已結業)

最近係非常時期，想同屋企人出街食飯都要搵啲空曠啲嘅地方，避免太多人逼埋一齊。所以今日就同佢地嚟錦上路呢間食BBQ。揀呢間係因為佢有得燒大頭蝦，而啲蝦係新鮮生猛係個水池入邊俾你自己撈嚟燒。捉佢出嚟燒之前，要擺佢落去冰桶度凍暈佢。燒完之後真係好鮮甜美味，而且每一隻都有膏，真係好正。但係啲蝦唔係任食，而係計人頭每人八隻。講返個爐先，佢呢度用嘅係環保炭，所以燒足兩個鐘，都唔需要換炭。除咗大頭蝦之外，呢度嘅其他肉類，丸類同埋飲品都係任食嘅。佢啲肉類都好新鮮，特別係啲雞翼同埋雞扒，真係好滑好Juicy。去到臨尾，仲有燒大蜆，呢個大蜆就比你自己調味，我自己就整咗一個辣，一個唔辣。啲蜆粒粒都好大粒，好鮮甜。