成都老碼頭火鍋 (已結業)

週日約咗朋友喺旺角食晏，佢話要食火鍋，冇得俾我揀😆，主動帶咗我嚟呢間「成都老碼頭」火鍋店，佢話坐得舒服食物美味，而且午市有八折。朋友揀咗「宮廷藥膳鍋底」，鍋底上嚟嘅時候，非常巨型兼靚靚；呢個「宮廷藥膳鍋底」裏面真係已經有頗多藥材：紅棗、杞子、當歸、黨參、等等，感覺滋味有益。食材方面我哋叫咗「西班牙黑毛豬腩肉」同「即炸響鈴」，「黑毛豬」有濃郁豬肉味，好甘香；「響鈴」真係即炸，非常新鮮香脆鬆化，就咁食好味，稍為焯一兩秒，「響鈴」吸收咗藥膳湯然後食，更加美味；「黑毛豬」同「響鈴」食完一碟唔夠喉，太美味，所以兩樣都番兜再叫😆。仲有「皇帝雞件」、「手工西洋菜餃」、「蛋餃」、「皇帝菜」全部都新鮮好味。我仲點咗個泰國椰青，清清熱氣先～。親切嘅店員安排我哋坐卡，朋友同我一路烚吓烚吓一路講笑，坐咗成三個鐘。食咗咁多嘢😆，折咗每人$280，都幾抵。