豐記魚蛋粉 (已結業)

剛發現原來君滬執左笠，估唔到。新開麵檔見佢招牌打正魚蛋粉，專登黎試，但真係罷鬼！連大元邨街市間潮興既魚蛋都比佢還好。但星期六 lunch 人頭擁擁，座無虛席，可能因為位置明顯易見，又係新屎坑啦。有粉麵飯提供，連魚麵都有噃。魚蛋河走蔥加腩汁，首先試左招牌野先。叫左走蔥都照樣跟蔥芫茜，好采無倒落碗河度，會匙羹盛著，我唯有掉落枱啦。魚蛋魚片一咬即散，不爽不彈，魚味淡而死實無鮮味，質地好發泡膠。湯底清淡，雖然 menu 打住係鮮骨響螺湯底，但麻麻地。加點腩汁還好，如果唔係就淡如水。河粉煮得好，棉滑唔會硬屈屈，完整一束束食得開心，滿意。辣椒油香而不辣，單調而且有點咸，跟香港仔魚蛋粉機乎一樣，一啲都唔吸引。後生仔侍應招呼熱情，敬業樂業，主動兼進取，讚。