酒鍋 (天文臺道) (已結業)

一向都非常喜歡打邊爐，今次去到位於尖沙咀心臟地帶嘅酒窩，裝修環境夠晒格調，絕對同出面任食火鍋風馬牛不相及。食物質素當然亦更勝一籌，先有呢個4款湯底嘅火鍋，有新鮮波士頓龍蝦做嘅湯底、辛辣充足嘅四川麻辣、豐富材料嘅牛腩蘿蔔、以及潮式沙嗲，各有特色，不論食辣定唔得辣嘅朋友都啱!而呢度嘅炸魚皮，亦唔係普普通通嘅炸魚皮，加上咸蛋粹，更似新加坡嘅口味，即叫即炸，入口更加香口香脆!牛元帥拼盤亦係必叫之選，上乘嘅食材，賣相已經夠吸引，係滾湯中滾大概半分鐘，細味之下，牛肉鮮嫩無比，唔需要多點醬汁，更可原汁原味品嚐! 而牛展同牛舌都帶有食材嘅爽勁口感，值得推介!而麻婆豆腐餃、三拼福袋都係外間火鍋店少有嘅食材，前者入口軟滑，帶有微微辣味，口感相當特別; 而三拼福袋分別有鵪鶉蛋、蝦肉、同手打牛肉做餡料，加上薄薄嘅蛋皮，就更加可以品嚐到滿滿嘅餡料，滿足感爆燈。