古今二 (荃灣千色匯I) (已結業)

同朋友去荃灣行完街想搵個位坐低食下野，見呢間食卷物嘅幾吸引，就試吓啦。店鋪牆上面有啲卷物名好得意，又煙花又火山咁，一於試吓先。一上枱，好有驚喜喎，好大堆卷物，感覺上就係堆到成坐山咁，睇得出幾有心思去設計，起碼係會令我留下深刻嘅印象。有吞拿魚粒，三文魚粒，同類似薯片嘅脆片組成嘅煙花，食得出魚好新鮮，軟淋淋，再加上口感好鬆脆嘅脆片，雙重口感，竟然出奇地夾。火山入面有好多帶子，好鮮甜。份量好足，女仔胃口唔大，嗌呢個組合絕對飽肚，而且真係幾好味。網燒牛舌一定要嗌呢個，我個人好鍾意食牛舌，呢間嘅牛舌都真係燒得唔錯。有一定嘅厚度，食落口啖啖肉，好嫩。仲嗌多咗個龍捲風沙律份量好多，蟹柳，中華沙律，蟹籽，生菜，仲有蛋黃醬同脆片，好好食。下次可以再試其他，我覺得性價比都高，價錢合理，食材新鮮又大份。