御前上茶 (已結業)

唔怪得唔駛等位，同樣價錢過隔離搵嘢食仲多選擇、質素亦無咁差，食完今次認真唔會有下次。服務態度好似嫌客煩咁，張檯細、到上第二碟菜行到埋嚟竟然『唔該』我喎，我當堂打個突，而家係咪我要做埋你職責幫你收檯啊？見到咁狀況應該店員收咗已經食完嘅碟先再上丫嘛，唔通你『唔該』完我啲碟識自己飛走啊？再講食物質素，份量係夠飽，但食嘅嘢完全係狗屎垃圾。講個茶漬飯先，上嚟嘅茶無茶味，咁你不如入啲熱水俾人撈飯算喇；然後啲料係樓上UNY賣嘅飯素＋一片鰻魚，咁樣就盛惠六十幾蚊。到個雙醬薯條，薯條炸到又乾又泡晒油，食落去咸到差啲要換腎，食咗一半到已經無辦法再食。咁嘅價錢食啲咁嘅嘢，一定係覺得香港多傻人做老襯先夠膽咁做生意，係，老襯係多但永遠都只係做一次，我就放長雙眼睇下樂富班客可以俾佢搵幾耐笨囉，呵呵。