Koretaly (已結業)

想試好耐，不過真係唔太就腳，所以其實係要做好心理準備，專登預時間響牛頭角地鐵站行大概八至10分鐘過去。搵咗一陣，要先行過好多車房，去到環境比較簡陋，不過其實食紫菜包飯都算只係小食，所以最緊要都係可以坐得隨便啲都OK。menu好簡單，叫咗兩款紫菜包飯，一款係牛肉，另一款係蟹棒飯卷。兩款都係推介，真係唔錯，個portion都好合理。響香港食紫菜包飯，最可惜嘅就係好多時個size卷得太細，材料唔夠豐富，但係就賣得唔平。最唔鍾意係好多個地方預早好多整好，跟住紫菜唔新鮮，仲要凍冰冰。人哋韓國整嘅紫菜包飯，面頭會掃一層麻油，所以好香。今次呢間做得好好，紫菜包飯面頭都有掃一層麻油，有圖有真相，好多時其實就係響呢啲細節位贏咗。雖然location唔就腳，但係食完之後到而家都會有啲回味，想再返去食。另外，亦都點左炸雞，超好味，個粉唔會好厚，但係好夠脆！雞肉嘅調味都啱啱好。比較遜色係啲自家製Kimchi，覺得唔夠入味。總括，都係值得推介。